تجربة سو : بيتزا البطاطس + كاسترد الشيكولاتة بالبوريو

طبعا كان يوم انا عاملة فيه رجيم وعمالة اعذب نفسي بصور الاكل فقررت اني اعمل حاجة جديدة في يوم الفري بتاعي
قلبت وشفت بيتزا البطاطس ولقيتها اخترااااااااااع الصراحة وعجبني جدا جدا

بيتزا البطاطس

تجربتي : 

انا الصراحة استخدمت موتزاريلا مش جبنة شيدر قلت عشان تبقى بيتزا بيتزا يعني ولو اني اعتقد لني لو عملتها تاني هروح للشيدر عشان الصراحة طعم الموتزاريلا مكنش باين لان طعم الحاجات التانية كان اقوى منها
انا حطيتها في الفرن 20 دقيقة زي الوصفة ما قالت بس ده مخلاش البطاطس تستوى كانت محتاجة تقعد اكتر من كده كانت بتقرش شوية وحطيت الموتزاريلا في اخر خمس دقايق عشان لما تسيح متتحرقش
الطعم كان جميل بس طعم البطاطس مكنش باين من السوسيس قوي لانها كانت بتقرش اول حاجة وحسيت ان لو البطاطس مسلوقة ومهروسة كطبقة تحت الاكل كانت هاتبقى احلى بكتير
البطاطس عشان مكعبات لما جيت اقطع مربعات زي الشكل اللى في الالبوم مطلعش مظبوط فعشان كده قررت ابقى اجربها مهروسة فعلا
النتيجة : لازم تجربوها سريعة ولذيذة 

التجربة التانية : التحلية
برضه قررت اعمل الحلو يوم الفري وكنت عاوزة حاجة سهلة وفي السريع
حلو الكاسترد بالاوريو

انا جبت الكاسترد بالكاكاو وبعدين حسيت ان المقادير قليلة قوي وانا بعمله فقررت اني اخليه مقدار ونص عشان اعرف اخليه لاربع اشخاص
اللى انا زودته شوية كمان هو الكاكاو في الخليط اللى بيتحط على النار وبصراحة دي فلتت مني لان طعم الكاكاو زاد قوي كان حلو بس تقيل شوية يعني لما تعمله الخليط على النار ولقيتوه فاتح سيبوه زي ماهو ماتحاولوش تزودوا كاكاو زيي :)
 انا بقى حبيت احط التاتش بتاعتي وعملت كريم شانتي في خمس دقايق بكيس كريم شانتي دريم وزوقته ببسكوت بوريو وبرش شيكولاتة جلاكسي

طعمه طبعا كان جميل وبجد سريع لازم تجربوه وبعدين ابدعوا بقى في البسكوت والطبقات براحتكوا 

تجربة سو : Oriflame pure colour lipstick

النهاردة هنجرب 3 ألوان روج من اوريفليم
Oriflame pure colour lipstick
ودي صور الروج في الكاتلوج

 الألوان اللى اخترتها هي : Vintage rose - Warm fuschia - Radiant red
نبدأ بقى بشكل العبوة 

ودي الوان الروجات

التجربة : 

بالنسبة لي انا بعشق لون vintage rose بيدي لون طبيعي وردي والصور الصراحة مش مدياله حقه الروج كريمي الملمس وبيرطب الشفايف جدا وبالاضافة ان ريحته جميلة قويالصراحة السعر بتاعه حلو جدا بالمقارنة بروجات تانية في السوق زي تشاو وسيبل في نفس قيمة السعر ويمكن اغلي وكمان خامته الكريمي احلى بكتير منهم دي تجربتي سوووووووو وبس :)

تجربة موكا : ماسكرا أوريفليم 2 FX

المفروض على كلام الشركة عن الماسكرا دي في الكاتلوج ان الفرشة الاولانية للوك نهاري شوية للتسريح والتطويل والفرشاة التانية للوك اشد شوية وبتكثف الرموش اكتر واكتر
ودي كانت تجربتي مع الماسكرا 

ده شكل الفرشاة الاولى بتاعت اللوك النهاري

الفرشة الاولانية بتسرح كويس جدا و اكتر ماسكرا عرفت اسرح بيها

ودي شكل عيني من غير ماسكرا خالص 

ودي بعد ماحطيت من اول فرشاة

  

و الفرشة التانية بتكثف رموشي و منغير اي تكتلات
ودي بعد ماحطيت من تاني فرشاة

و يعتبر اكتر ماسكرا عرفت اظبطها كويس

و عايشة معايا بقالها كتير و باستعملها كل يوم

و سعرها معقول بالنسبة لاسعار الماسكرات التانية مش حساه فارق فرق كبير يعني

تجربة موركو : ازاي تعملي أول لكلوك من غير ماتكوني بتعرفي الكروشيه

الشتا وجمال الشتا وبروده الشتا،،،، والواحد بيحتاج حاجه تدفئ رجله،،، البس ايه البس ايه،،، نورت في دماغي،، لكلوك؟!؟.
طب اجيبه شكله ايه
فلت اعمل سيرش على النت ،،، وبدا السيرش وكانت من ضمن الصور صوره لكلوك كوروشيه

ولقيت ليه فيديو لطريقة العمل والفيديو ده 

http://www.youtube.com/watch?v=2Pt5xkuynyE&sns=em

عجبني اوي جري نزل لمحل الخيوط ولقيت أنواع كتيييير
وبقيت عامله زي العيل الصغير اللي دخل مل حلويات مش عارف يختار ايه ولا ايه 

سالت الراجل اللي في المحل
انا: عمو سلام عليكم انا كنت عايزه اعمل لكلوك مقاس ٣٧ ٣٨ عمو: ماشي عايزه من ابو عشره ولا الو خمسه
انا: وريني الاتنين
شاور لي على الباترينه لقيت الخيوط في تركي ومصري وعلى حسب سمك الخيط ووزنه بيخف السعر طبعا التركي أغلى بس انا المصري خامته عجبتني اكتر من التركي ،،، التركي شويه بيعمل وبره
اخترت لون معين
وأنا: عمو هو انا هحتاج كام شله خيط،"شله خيط يعني بكره"
عمو: هتحتاجي شله ونص من ابو ١٠٠ جم 

وقد كان وكان سعر جميييييل خمس جنيهات
وكان فاضل الأبره ودي بتعمد على سمك الخيط فرش حلي عمو صاحب المحل مقاس ٥ مم

وكانت ب ٣ جنيه

أشتروهم وروحت مشيت مع الفيديو خطوه خطوه وطلع في الآخر اللكلوك ده :))))

أخد مني اربع ساعات علشان كنت لسه بتعلم لأول مره وكمان كل ما تطلع حاجه غلط إفك الخيط

اتمنى تجربوا التجربة الجميلة دي زيي ولو حد عملها يورينا الصور واكيد انتوا هاتبدعوا اكتر مني بكتيييير :)

منتجات جوز الهند لعلاج الشعر من اوريفليم

اول ماقريت الكلام اللى كاتبينه على المنتج انه جمام زيت بجوز الهند الطبيعي ويتحط لمدة خمس ساعات على البارد 

عجبني جدا انه بيتحط عالبارد عشان بكسل جدا اعمل حمام زيت سخن لنفسي فلو هو بيدهن عادي كده وهو بارد فيبقى قشطة قوي وكمان عجبني انه طبيعي 100% زي مابيقولوا ولو اني مصدقتش في الأول
كنت فعلا بحطه قبل 4 او خمس ساعات قبل الاستحمام

ده شكل العبوة 

هو ريحته نفس ريحة زيت جوز الهند ممكن أحلى شوية والأزازة متصممة حلو قوي لما باجي احط الزيت على ايدي مبتدلقش كتير

انا بس لما جربت ابات بيه زي مابيقولوا حسيت اني محبتش ريحة شعري وهو مزيت بقاله ساعات كتير كده بس مش مشكلة يعني كده كده هيتغسل

نتيجة وفوائد التجربة :

- مش محتاجة اسخن الزيت قبل ماحطه وده ساعدني لأني كسولة جدا
- بيطري الشعر جدااا (اصلا اشتريته وانا شعري في قمة التقصيف وكان جاف جدا بسبب النقصيف ) وكانت نتيجة الزيت هايلة
- مصدقتش في الأول انه طبيعي تماما بس لقيته في الشتا الزيت جمد جوا الازازة صدقت لان مكان عندنا زيت جوز هند طبيعي من السعودية وفعلا بيجمد في الشتا وطبعا ابتديت انزل منه الزيت بعد ماحطيت الازازة في كباية ميه سخنة
- حسيت ان الازازة صغيرة وهتخلص بسرعة بس دي تهيؤات :) لان فعلا مش بينزل كتير في المرة وبتقدري توزعي كويس وقاعد معايا اهو بقالى فترة طويلة

معجبنيش في ايه :

- مفيش حاجة بالعكس خلاني افكر اجيب امبولات جوز الهند اللى هاتكلم عليها دلوقتي

------------------------------------------------------------------------------------------------------------

فعلا التجربة لما عجبتني فكرت اجيب امبولات جوز الهند قلت كده بقى هاخد الفايدة مركزة :D

في الاول افتكرتها زي امبولات الصبار والبانثينول اللى بجيبها من شركة ايفا من الصيدلية بتتحط على الشعر بعد ماتغسليه مرة او مرتين في الاسبوع لكن قريت اللى كاتبينه ورا لقيتها

"Hot oil for dry or damaged hair.Place unopened tube in hot water for 1 minute.Massage contents of tube into wet hair for 1 minute, rinse and shampoo as usual."

"وترجمة الكلام : حمام زيت ساخن للشعر الجاف والتالف. ضع العبوة الغير مفتوحة في ماء ساخن لمدة دقيقة. دلكي الشعر بمحتويات الأنبوبة لمدة دقيقة واغسلي بعدها شعرك بالشامبو كالمعتاد"

 زي حمام زيت مركز بس ميزته بقى انك هاتحطيه دقيقة واحدة :D
هو في أحلى من كده احنا في عصر السرعة برضه :) بجد برضه نتيجته حلوة زي الزيت اللى فوق بالظبط واكيد هجيب منها تاني