استخدام موس الشعر للتمويج واضافة الحجم

- الشعر لازم يكون مبلول ومتنشف بالفوطة

وبعدين حطي شوية ملء الكف من موس الشعر في ايدك 

ابتدي حطي الموس على الشعر ووزعيه بايدك بس ابتدي من الجذور اهم

قسمي شعرك اربع اقسام

وابتدي هاتي اطراف الشعر من كل قسم وادعكيها كويس قوي في الجذور زي مايكون بتغسلي شعرك بالشامبو (وطبعا لو لقيتي ان كمية الموس اللى حطتيها قليلة زودي)

يفضل وانتي بتدعكي كل قسم تكوني منزلة شعرك كله عكس الاتجاه يعني راسك لتحت عشان الجذور تدي حجم وانتي بتسرحيها بايدك عكس الاتجاه

الصورة للتوضيح فقط

- لفي كل قسم وثبتيه بتوكة وكمان ممكن تقسمي اكتر كل قسم لو عاوزة تموجات اكتر

( لو مستعجلة استعملي السيشوار وممكن على اقل درجة او عالبارد فقط للتنشيف وبرضه راسك تبقى تحت وشعرك عكس الاتجاه )

ممكن كمان تحطي الموس وتوزيعه على الشعر وبدل ما تعملي كيرلي تلفيه رولات كبيرة واستمتعي بالحجم بجد

وافضلوا ادعوا ربنا كتير شعركوا ميطلعش كده :D

او كده لا قدر الله :D

لا بجد استمتعوا بالتمويجة الحلوة :)

وده فديو ازااي استعمل الموس بتاع الشعر في عمل الكيرلي في البيت 

http://www.youtube.com/watch?v=e1Ahyxim__o

(ملحوظة اللى بيستخدمه ده اسمه ديفيوزر بيطلع هوا مش سخن لتصفيف الشعر وممكن برضوا مش تستخدموه)

أدوات المكياج والشعر من اوريفليم

دي صور عدة المكياج اللى اشتريتها من اوريفليم 

اول حاجة اشتريتها كانت اداة ثني الرموش دي

دي الاستبن بتاعت الحتة المطاط للجزء السفلي

في الاول معرفتش استخدمها وقلت ملهاش لازمة لكن شفت كذا فديو من على اليوتيوب زي ده

http://www.youtube.com/watch?v=rhyDCs88kqE

وعرفت استخدمها صح ازاي وطلعت النتيجة تحففففففففففة لدرجة اني بقيت استخدمها كل يوم ( بعد كده عرفت ان مينفعش استخدمها بشكل متواصل لان ده بياثر على الرموش جامد وبستخدمها في الخروجات المهمة ) 

------------------------------------------------------------------------------------------------------------

بعد كده جبت فرشة البودرة دي

خامتها حلوة قوي وشعرها بيمسك البودرة كويس وكمان بتوزع كويس قوي وكبيرة انا حبيتها الصراحة :)

-----------------------------------------------------------------------------------------------------------

اخر حاجة جبتها كانت فرشاة الروج والكونسيلر

الصراحة انا طول عمري بحط الكونسيلر بايدي او السفنجة لسه متعودتش بس الميزة الحلوة قوي اللى فيها انها بتاخد اقل كمية من الكونسيلر وبتوزعه كويس جدا وطبعا بستخدم الجزء بتاع فرشاة الروووووج لانه بيساعدني اوصل للكورنر بسهولة وبجد عاجباني خامات الفرش بتاعت مكياج اوريفليم جدا تحسي انها بروفيشنال بجد وكمان متينة 

------------------------------------------------------------------------------------------------------------

انا قلت اما اتجنن بقى واجيب فرشاة شعر واخترت دي 

بجد خامتها حلوة جدا والسنان بتاعتها اخرها قطعة رصاصي مدورة بتبقى حنينة جدا على الفروة غير ان الايد بتاعت الفرشاة والخامة ممتازة
بس عيبها الوحيد اني بحب اطلع الشعر من الفرشاة مع كل تسريحة وهو مبيطلعش منها بسهولة ( بشيله بمبرد الضوافر ) او لما يكون الشعر اللى متجمع فيها كتير ساعتها بس بيتشال بسهولة